<div align="center">مشغول وشّو وانا اللي أعرف اسرارك<br>
واعْرفـْك جدا ..ً وأكثر ممّا أعرفني<br>
<br>
تراني افهــم عليك .. وكـــنّ أطـوارك<br>
تقول شكلك زهقْـت وشبْــه عايفني<br>
<br>
إذا وجــودي معــك ما يلفت انظــارك<br>
فالأحسن امشي.. ولا أقعد وتنزفني<br>
<br>
يجوز لامــن مشيـت .. الحال يتـبارك<br>
أرتاح وانسى ويرجع للكرى جفني<br>
<br>
صحيح.. ودي في هـذا العمر نتشارك<br>
لكنّ وضعـي معـاك الحين يؤسفني<br>
<br>
أنا طبــاعي كــذا مــن قبـل لا اختارك<br>
ماقـطّ وجهي على اللي ما يوالفني<br>
<br>
إمــا تجيــني .. وداري عِـــدّهـا دارك<br>
والاّ على الوهم .. يكــفي لا تكلفني<br>
<br>
تعبـــت والله .. ولا يمدينـــي اتـدراك<br>
قطـار عمــر ٍ من اول معك طايفني<br>
<br>
قلّي شسوّي إذا استبطــيت مشـوارك؟<br>
الصبر يفني وبعـض الضيم مايفني<br>
<br>
أخاف باكر يجي واغـْـدي "سِنمّارك"<br>
ومن فوق قصـرٍ بنيته لك بتحذفني<br>
<br>
واخاف تخلـف حـلاوة جنّتك .. نارك<br>
واموت وحدي ولالْقى مين يسعفني<br>
<br>
شف عاد لا من بــقالي غير تذكــارك<br>
أحَــنّ مــن هالحيـاه .. بترْبتي دفْني<br>
<br>
فارجوك تصْدق معاي وتكشف ْستارك<br>
مـن دون احـلّفـْـك أو حتى تحلّـفني<br>
<br>
سؤال واحـد .. وابيــك تجمّـع افكـارك<br>
حتى تجاوب بكلّ وضوح وانصفني<br>
<br>
إصـرارك اول علي هو نفسه اصرارك؟<br>
ولاّ تغيّـرت ؟.. ياخي قول واتحـفني<br>
<br>
ومن قبـل تحكـــي تأكـّــد إن مقـدارك<br>
ما زال نفســه .. وما زالك تشرفني<br>
<br>
واهـمّ حـاجه .. قبـــل تبـدي تِــعذّارك<br>
عشان تسحـب.. وللذكرى تخلّـفْني<br>
<br>
أبيك تعرف .. وتـدرك .. إنّ مسيارك<br>
هذا أخيـــر .. وبعَـدْها منت شايفني<br>
<br>
( إمشْ بطريقك!! " وانا بتجيني اخبارك " ) .. ..<br>
لاعاد اعَـرْْفك.. ولاعاد انت تعرفني !!
</div>
Delicious
